Իրադարձություններ
«ՌՈՍՏԵԼԵԿՈՄ»-Ի ԱՋԱԿՑՈՒԹՅԱՄԲ ԿԱՅԱՑԱՎ «ԼԵԳՈՍՏԱՐՏ 2021» ՄՐՑՈՒՅԹԸ
![«ՌՈՍՏԵԼԵԿՈՄ»-Ի ԱՋԱԿՑՈՒԹՅԱՄԲ ԿԱՅԱՑԱՎ «ԼԵԳՈՍՏԱՐՏ 2021» ՄՐՑՈՒՅԹԸ «ՌՈՍՏԵԼԵԿՈՄ»-Ի ԱՋԱԿՑՈՒԹՅԱՄԲ ԿԱՅԱՑԱՎ «ԼԵԳՈՍՏԱՐՏ 2021» ՄՐՑՈՒՅԹԸ](/resources/rtarmenia/img/news/main/1622792314-2365.jpeg)
Մայիսի 23-ին «Ռոստելեկոմ»-ի աջակցությամբ առաջին անգամ անցկացվեց «Լեգոստարտ 2021» մրցույթը։ Մրցույթի կազմակերպիչը «Այբ» կրթական հիմնադրամն է, որը Ռոբոտների համաշխարհային օլիմպիադայի պաշտոնական ներկայացուցիչն է Հայաստանում։
«Լեգոստարտ 2021»-ը ուղղված էր ռոբոտաշինության ասպարեզում առաջին քայլերն անող թիմերի հմտությունների, կարողությունների և գիտելիքների զարգացմանը և խորացմանը, որպեսզի նրանք հետագայում կարողանան վստահորեն մասնակցել «Ռոբոտների համաշխարհային օլիմպիադա» միջազգային մրցաշարին։
Այս տարի «Լեգսոտարտ»-ը ուներ թեմատիկ ուղղվածություն․ թիմերը մրցեցին այնպիսի խնդիրների շուրջ, որոնց լուծումները միտված են համավարակի և բնական աղետների հետևանքների հաղթահարմանը։
Մրցույթին մասնակցեց 11 թիմ Երևանից և ՀՀ մարզերից։ Տարիքային խմբերում «Լեգոստարտ 2021» մրցույթի հաղթողներ ճանաչվեցին մասնակից հետևյալ թիմերը՝
- «ՆԱՎ» - տարրական տարիքային խումբ (Դիլիջան)
- «Գազպրոմ 4» -կրտսեր տարիքային խումբ (Երևան)
- «Մուշ» - ավագ տարիքային խումբ (Գյումրի)
Մասնակից թիմերից 3-ին «Ռոստելեկոմ» Հայաստան ընկերությունը նախապես տրամադրել էր Lego Mindstorms EV3/NXT լեգոհավաքածուներ, որոնցից 2-ը դարձան մրցույթի հաղթողներ։
«Մենք շատ ուրախ ենք, որ այս տարի ևս աջակիցն ենք այսպիսի հրաշալի ծրագրի։ Կարծում եմ, որ «Լեգոստարտը» շատ մեծ հնարավորություն կտա սկսնակ թիմերին հմտանալ և առաջիկայում մասնակցել ավելի պրոֆեսիոնալ մրցույթների՝ Ռոբոտների Համաշխարհային Օլիմպիադայի ազգային մրցաշարին և, ինչու ոչ, նաև՝ միջազգային փուլին։ Հաջողություն եմ մաղթում բոլոր թիմերին՝ հետագա ձեռքբերումների ճանապարհին»,-նշեց «Ռոստելեկոմ» Հայաստան ընկերության գլխավոր տնօրեն Հայկ Ֆարամազյանը։
Ընկերությունը աջակցել է նաև Creative Educational Technologies-ի կողմից կազմակերպված մասնագիտական դասընթացի իրականացմանը, որի նպատակն է սկսնակ թիմերի մարզիչների հմտությունների զարգացումը։
««Լեգոստարտ» անդրանիկ մրցույթը մեզ համար կարևոր իրադարձություն է, քանի որ առաջին անգամ ենք փորձարկում այս ձևաչափը լեգոն և ռոբոտաշինությունը սիրող էնտուզիաստների համար, ովքեր առաջին քայլերն են անում այս ոլորտում, և ես անչափ շնորհակալ եմ մեր գործընկեր «Ռոստելեկոմ» ընկերությանը, որը շարունակաբար աջակցում է ռոբոտաշինության զարգացմանը Հայաստանում։ Հենց «Ռոստելեկոմ»-ի մեր գործընկերների հետ համագործակցությամբ մենք եկանք այն եզրակացությանը, որ պետք է ստեղծենք մի նախնական հարթակ, որտեղ հնարավորություն ենք տալու սկսնակ թիմերին իրենց ուժերը փորձել ռոբոտաշինության մեջ և հետագայում ավելի լուրջ ռոբոտաշինական նվաճումներ ունենալ»,-նշեց «Այբ» կրթական հիմնադրամի գործադիր տնօրեն Սոնա Կոշեցյանը։
«Լեգոստարտ 2021»-ի թիմերը լավ հնարավորություն ունեն մասնակցելու հուլիսին կայանալիք Ռոբոտների համաշխարհային օլիմպիադայի ազգային փուլին։